ಛಾಯಾಚಿತ್ರಗ್ರಾಹಕ ಕಿಂಗ್‌ಟನ್‌ ಒಂದೇ ಕೈಯಲ್ಲಿ ಅದ್ಭುತ ಕ್ಯಾಚ್‌ !

Team Udayavani, Jun 4, 2019, 6:04 AM IST

ಲಂಡನ್‌: ಬಾಂಗ್ಲಾದೇಶ-ದಕ್ಷಿಣ ಆಫ್ರಿಕಾ ಪಂದ್ಯದ ವೇಳೆಛಾಯಾಚಿತ್ರಗ್ರಾಹಕರೊಬ್ಬರು ಒಂದು ಕೈಯಲ್ಲಿ ಅದ್ಭುತ ಕ್ಯಾಚ್‌ ಪಡೆಯುವ ಮೂಲಕ ಗಮನ ಸೆಳೆದಿದ್ದಾರೆ. ನಾಯಕ ಫಾ ಡು ಪ್ಲೆಸಿಸ್‌ ಭರ್ಜರಿಯಾಗಿ ಸಿಕ್ಸರ್‌ ಸಿಡಿಸಿ ಅರ್ಧ ಶತಕ ಪೂರೈಸಿದರು.

ಈ ಸಿಕ್ಸರ್‌ ಚೆಂಡು ನೇರವಾಗಿ ಮೈದಾನದ ಪೆವಿಲಿಯನ್‌ ಎಂಡ್‌ ಕಡೆ ಸಾಗಿತು. ಅಲ್ಲಿಯೇ ಛಾಯಾಚಿತ್ರ ತೆಗೆಯುತ್ತಿದ್ದ ಇಯಾನ್‌ ಕಿಂಗ್‌ಟನ್‌ ಒಂದೇ ಕೈಯಲ್ಲಿ ಅದ್ಭುತ ರೀತಿಯಲ್ಲಿ ಚೆಂಡನ್ನು ಹಿಡಿದರು. ಅಲ್ಲಿದ್ದ ಪ್ರೇಕ್ಷಕರೆಲ್ಲರೂ ಅವರಿಗೆ ಮೆಚ್ಚುಗೆ ಸೂಚಿಸಿದರು. ಕಿಂಗ್‌ಸ್ಟನ್‌ ಅವರ ಪ್ರಯತ್ನವನ್ನು ” ಪ್ಲೇ ಆಫ್ ದ ಡೇ’ ಎಂದು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್‌ ಮತ್ತು ಬಿಬಿಸಿ ಬಣ್ಣಿಸಿದೆ.

ಕಿಂಗ್‌ಟನ್‌ ಅವರು ಪ್ಲೆಸಿಸ್‌ ಸಿಕ್ಸರ್‌ ಹೊಡೆತದ ಪ್ರಯತ್ನವನ್ನು ತನ್ನ ಕ್ಯಾಮರಾದಲ್ಲಿ ಕ್ಲಿಕ್ಕಿಸಿದ್ದರು. ತತ್‌ಕ್ಷಣವೇ ಆ ಚೆಂಡು ತನ್ನ ಕಡೆ ಬರುತ್ತಿದ್ದುದನ್ನು ಗಮನಿಸಿದ ಅವರು ಉದ್ದ ಲೆನ್ಸ್‌ನ ಕ್ಯಾಮರಾವನ್ನು ಎಡಗೈಯಲ್ಲಿ ಹಿಡಿದು ಬಲಗೈಯಲ್ಲಿ ಚೆಂಡನ್ನು ಪಡೆದರು. ಬಳಿಕ ಕ್ಯಾಚ್‌ ಪಡೆದ ಸಾಹಸವನ್ನು ಪ್ರೇಕ್ಷಕರತ್ತ ತೋರಿಸುತ್ತ ಸಂಭ್ರಮಿಸಿದರು.